یه‌په‌گه‌ كۆبانێی له‌ داعش پاككرده‌وه‌

خه‌ندان-

دوای‌ دزه‌كردنی‌ چه‌كدارانی‌ رێكخراوه‌كه‌ و ده‌ستبه‌سه‌رداگرتنی‌ چه‌ند خاڵێك له‌نێو شاره‌كه‌دا، روانگه‌ی‌ سوریا بۆ مافه‌كانی‌ مرۆڤ رایگه‌یاند، ئه‌مڕۆ شه‌ممه‌، یه‌كینه‌كانی‌ پاراستنی‌ گه‌ل (یه‌په‌گه‌)، چه‌كدارانی‌ رێكخراوی‌ تیرۆریستی‌ داعشیان له‌ شاری‌ كۆبانێ‌، ده‌رپه‌ڕاندووه‌.

روانگه‌ی‌ سوریا بۆ مافه‌كانی‌ له‌ به‌یاننامه‌یه‌كدا رایگه‌یاند: "یه‌كینه‌كانی‌ پاراستنی‌ گه‌ل (یه‌په‌گه‌)، توانیان هه‌موو ئه‌و شوێنانه‌ له‌ چنگی‌ چه‌كدارانی‌ رێكخراوی تیرۆریستی داعش ده‌ربهێنن كه‌ پێشتر له‌نێو شاری‌ كۆبانێدا ده‌ستییان به‌سه‌رداگرتبوو".

رودی‌ محه‌مه‌د ئه‌مین چالاكوانی‌ كورد وتی‌: "له‌ئێستادا شاری‌ كۆبانێ‌ به‌ ته‌واوه‌تی‌ له‌ژێر كۆنترۆڵی‌ یه‌كینه‌كانی‌ پاراستنی‌ گه‌ڵدایه‌ و له‌ میانی‌ پرۆسه‌ی‌ پاككردنه‌وه‌ی‌ شاره‌كه‌ش له‌ تیرۆریستان، ژماره‌یه‌كی‌ زۆر له‌ چه‌كدارانی‌ داعش كوژران".

رۆژی پێنجشەممە 25ی حوزەیرانی 2015، ژماره‌یه‌ك چه‌كداری رێكخراوی‌ تیرۆریستی‌ داعش دزه‌یان كرده‌ نێو شاری‌ كۆبانێ‌ له‌ رۆژئاوای‌ كوردستان و له‌دوای‌ ته‌قینه‌وه‌یه‌ك كه‌ ژماره‌ك هاوڵاتی‌ شاره‌كه‌ی‌ تێیدا شه‌هید بوو، چه‌كدارانی‌ داعش خۆیان له‌نێو چه‌ند شوێنێكی‌ شاره‌كه‌دا قایم كرد و دواتر شه‌ڕ و پێكدادانی‌ توند له‌نێوان ئه‌و چه‌كدارانه‌ و یه‌كینه‌كانی‌ پاراستنی‌ گه‌ل دروستبوو كه‌ دواجار به‌ شكانی‌ تیرۆریستانی‌ داعش كۆتاییان پێهات.

خ.غ


ئه‌م بابه‌ته 2519 جار خوێنراوه‌ته‌وه‌‌


Copyright © 2015 Xendan.org all rights reserved
Design by AVESTA GROUP , programming and database by KURDSKY.COM