پڕۆژه‌ی جوانكردنی (خه‌مزه‌ و قوله‌ ره‌ش) ده‌كرێته‌وه‌

خه‌ندان ـ

پڕۆژه‌ی جوانكردنی (خه‌مزه‌ و قوله‌ ره‌ش) له‌ سه‌ر چیای ئه‌زمه‌ڕ له‌ شاری سلێمانی، كه‌ له‌ كه‌پر و كافتریا و كۆشك و سێتی ته‌والێت و یاری منداڵان و سه‌وزایی پێكدێت كاره‌كانی كۆتایی هاتووه‌ و به‌ رووی گه‌شتیاران و هاوڵاتیانی سنووره‌كه‌دا ده‌كرێته‌وه‌.

به‌ گوێره‌ی راگه‌یه‌ندراوێكی به‌ڕێوه‌به‌رایه‌تی گشتی گه‌شتوگوزاری سلێمانی كه‌ وێنه‌كی ده‌ست خه‌ندان كه‌وتووه‌، تیایدا ئه‌ندازیار هاوڕێ عه‌لی، سه‌رۆكی لیژنه‌ی سه‌رپه‌رشتیار، ئه‌وه‌ده‌خاته‌ڕوو كه‌ پڕۆژه‌كه‌ له‌ 15 كه‌پر و یه‌ك كافتریا و كۆشك و سێتی (w.c) و له‌گه‌ڵ روبه‌رێكی به‌رچاو سه‌وزایی و جێگیركردنی یاری منداڵان پێكدێت كه‌ به‌ گوژمه‌ی (968.675.490) دینار ئه‌نجامدراوه‌ و له‌ 2/9/2013 ده‌ست به‌كاركردن كراوه‌ تیایدا و له‌ 30/4/2015 سه‌رجه‌م كاره‌كانی كۆتایی هاتووه‌.

ده‌شڵێت: "كاره‌كانی پڕۆژه‌كه‌ به‌ رێژه‌ی 100% ئه‌نجامدراوه‌ ئێستاش خه‌مڵاندنی بۆده‌كرێت به‌ ئامانجی به‌كرێدانی بۆئه‌وه‌ی له‌و رێیه‌وه‌ به‌ رووی گه‌شتیاراندا بكرێته‌وه‌".

سه‌رۆكی لیژنه‌كه‌ ئاماژه‌ به‌وه‌شده‌كات ئه‌و پڕۆژه‌یه‌ جگه‌ له‌ به‌خشینی دیمه‌نێكی سه‌رده‌میانه‌ به‌و ناوچه‌ گه‌شتیارییه‌، بۆئه‌وه‌ی وه‌ك سه‌یرانگایه‌كی دڵرفێنی ناوچه‌كه‌ رێكبخرێت، جگه‌ له‌وه‌ی ئاماده‌كردنی رێگاكه‌شی كارئاسانی ده‌كات بۆ گه‌شتیاران و هاوڵاتیانی ناوچه‌كه‌ بۆئه‌وه‌ی بێ گرفت بگه‌نه‌ سه‌یرانگاكه‌ و به‌ دابینكردنی سه‌رجه‌م پێداویستییه‌كان گه‌شتوسه‌یرانی خۆیانی تێدا ئه‌نجام بده‌ن و كاتێكی ئاسوده‌ به‌سه‌رببه‌ن.

لای خۆیه‌وه‌ ئه‌ندازیار سه‌ڵاح عارف، سه‌رۆكی لیژنه‌ی به‌كرێدانی به‌ڕێوه‌به‌رایه‌تی گشتی گه‌شتوگوزار، رایگه‌یاند: ئه‌مڕۆ یه‌كشه‌ممه‌ 14/6/2015 رێكاره‌ یاسایی و كارگێڕییه‌كان له‌لایه‌ن لیژنه‌ی تایبه‌تمه‌نده‌وه‌ گیراونه‌ته‌به‌ر و به‌ شێوازی زیادكردنی ئاشكرا (مزایه‌ده‌) كه‌ له‌سه‌ر شوێنی پڕۆژه‌كه‌ ئه‌نجامدرا، بۆئه‌وه‌ی بدرێته‌ كه‌رتی تایبه‌ت و به‌ڕێوه‌ی ببات.

وتیشی: "دوای كۆتایی هاتنی رێكاره‌ یاساییه‌كان، پڕۆژه‌كه‌ راده‌ستی به‌كرێگرته‌ ده‌كرێت و چاوه‌ڕوان ده‌كرێت له‌ سه‌ره‌تای مانگی ته‌مموز به‌ رووی گه‌شتیاراندا بكرێته‌وه‌".

هــ. ر





















ئه‌م بابه‌ته 700 جار خوێنراوه‌ته‌وه‌‌


Copyright © 2015 Xendan.org all rights reserved
Design by AVESTA GROUP , programming and database by KURDSKY.COM