زۆرترین خوێنراو
 
Loading
لڤین: نێچیرڤان له‌ بێدەنگكردنی گۆڕان سەركەوتوو بوو
PM:01:47:21/05/2012
سلێمانی: کۆبوونه‌وه‌ی نه‌وشیروان مسته‌فاو نێچیرڤان بارزانی 14ی ئاداری 2012
خه‌ندان

گۆڤارێك باس لەوە دەكات كە نێچیرڤان بارزانی لەو "پیلان"ەیدا سەركەوتووە بووە كە بۆ بێدەنگكردنی بزووتنەوەی گۆڕان دایڕشتبوو، رۆژنامەنووسێكیش پێیوایە كە ئێستا "گۆڕان زۆر گۆڕاوەو ئەو گۆڕانەی سەرەتا نەماوە كە بۆ بەرگری لەخەڵكی هەژار هاتبوو، ئەو گۆڕانە نەماوە كە هەوڵی جیاكردنەوەی حزب لەحكومەت بدات و بیەوێت مۆدێلی حزبایەتی تێپەڕێنێت".

لەراپۆرتێكی گۆڤاری لڤیندا كە لە ژمارە (198) دا بڵاوكراوەتەوە، ئاماژە بەوەكراوە كە نێچیرڤان بارزانی سەرۆكی حكومەتی هەرێم و جێگری سەرۆكی پارتی دیموكراتی كوردستان لە بێدەنگكردنی بزوتنەوەی گۆڕاندا سەركەوتنی بەدەستهێناوە.

هەر لە راپۆرتەكەدا هاتووە، سەردانی چەند جارەی نێچیرڤان بارزانی بۆ مەكۆی سەرەكی بزوتنەوەی گۆڕان لەسلێمانی، پێش دەست بەكاربوونی وەك سەرۆكی حكومەت و دوای دەست بەكاربوونیشی لەسەرۆكایەتی ئەنجومەنی وەزیران، تا رادەیەكی باش توانیویەتی بزوتنەوەكە لە رەخنەگرتن لە حكومەت هێور بكاتەوە، ئەوەشدەخاتەڕوو كە سەردانی ئاشتی هەورامی وەزیری سامانە سروشتیەكانیش بۆ مەكۆی سەرەكی بزووتنەوەكە لەسلێمانی بۆ هەمان مەبەست بووە.

رۆژی 24ی كانوونی دووەم‌و 14ی ئاداری ئەمساڵ، نێچیرڤان بارزانی دووجار سەردانی مەكۆی سەرەكی بزووتنەوەی گۆڕان-ی كردو لەگەڵ نەوشیروان مستەفا رێكخەری گشتی بزووتنەوەكەدا كۆبووەوە.

بە بۆچوونی سلێمان عەبدوڵڵا یونس ئەندامی ئەنجومەنی باڵای رێكخستنی یەكێتی لەئێستادا بزوتنەوەی گۆڕان سەركردایەتی ئۆپۆزسیۆن ناكات، بەڵكو یەكگرتووی ئیسلامی ئەو ئاڵایەی لێوەرگرتووە، هۆكارەكەشی بۆ بەهاری عەرەبی گەڕاندۆتەوە كە بۆتە هۆكارێك سەركردایەتی ئۆپۆزسیۆن بداتە دەست حزبێكی ئیسلامی وەك یەكگرتوو.

لای خۆیەوە یوسف محەمەد بەرپرسی ژووری لێكۆڵینەوەی بزوتنەوەی گۆڕان بۆ گۆڤارەكەی روونكردۆتەوە كە لەئێستادا بزوتنەوەكەیان ئەركی بۆتە چاودێری كردن و رەخنە گرتنی كەمكردۆتەوە، بەرپرسەكەی گۆڕان دەڵێت: "سەردەمی كابینەی شەشەم سەردەمی سزای سیاسی لایەنەكانی ئۆپۆزسیۆن و هەوادارەكانیان بوو، سەردەمی تێپەڕاندنی یاسای خۆپیشاندان و یاساكانی ئاسایش بوو، هەڵبژاردنی تێدابوو، خۆپیشاندانی جەماوەری تێدابوو، بەڵام ئێستا دۆخی سیاسی بەو شێوەیە نەماوەو تەنانەت هەوڵدراوە سزا سیاسییەكان نەهێڵدرێت و بەڵێنی جێبەجێكردنی داواكارییەكان دراوە".

لەبارەی سەردانە بەردەوامەكانی بەرپرسانی حكومەت و بزوتنەوەی گۆڕان، یوسف محەمەد دەڵێت: "هاتنی بەرپرسانی حكومی و وەزیرەكان بۆ لای بزوتنەوەی گۆڕان، كرانەوەی حكومەتە بەرووی بزوتنەوەی گۆڕاندا، كە سەرۆك وەزیران پێش راسپاردن و دوای راسپاردنیش سەردانی بزوتنەوەی گۆڕانی كردوە، ئەمەش سەردەمێكی تازەیە بەداننان بە ئۆپۆزسیۆندا لەهەرێمی كوردستان".

بەرپرسەكەی گۆڕان روونیدەكاتەوە كە ئەوان پێشتر چەندین جار ویستیان لەرێگەی پەرلەمانی كوردستانەوە پرسیار لەسەر پرسی نەوت لەوەزیری سامانە سروشتیەكان بكەن، بەڵام سەرۆكایەتی پەرلەمان رێگربووە، بۆیە نەیانویستووە خۆیان لەپەرلەماندا قەتیس بكەن.

بەبۆچوونی سوهەیب جەمیل رۆژنامەنووسی سەر كۆمەڵی ئیسلامی، بزوتنەوەی گۆڕان زۆر گۆڕاوەو ئەو گۆڕانەی سەرەتا نەماوە كە بۆ بەرگری لەخەڵكی هەژار هاتبوو، ئەو گۆڕانە نەماوە كە هەوڵی جیاكردنەوەی حزب لەحكومەت بدات و بیەوێت مۆدێلی حزبایەتی تێپەڕێنێت.

دواجار راپۆرتەكەی گۆڤاری لڤین باس لەوە دەكات كە نواندنی نەرمی لەلایەن بزوتنەوەی گۆڕان و سەردانی یەك لەدوای یەكی بەرپرسانی گۆڕان و حكومەت بۆی لای یەكتری، سەركەوتنی ئەو پیلانە دەگەیەنێت كە نێچیرڤان بارزانی بۆ بێدەنگكردنی بزوتنەوەی گۆڕان لەسەرەتای دەستبەكاربوونی وەك سەرۆكی حكومەت گرتیەبەر.


ئه‌م بابه‌ته 6502 جار خوێنراوه‌ته‌وه‌‌

هەواڵ

وەرزش

رادیۆ

خزمەتگوزاری

سەبارەت

رێکلام

Copyright 2014. Xendan for Publishing and Broadcasting. All Rights Reserved.