ئۆپیك رێكنه‌كه‌وت

خه‌ندان_ سۆران كه‌ریم


رێكخراوی‌ ئۆپیك له‌سه‌ر پرسی‌ نه‌وت و هه‌نارده‌كردنی‌ له‌ شاری‌ ڤییه‌نای‌ پایته‌خه‌تی‌ وڵاتی‌ نه‌مسا كۆبوونه‌وه‌، به‌ڵام دواجار نه‌یانتوانی‌ هیچ رێككه‌وتنێك له‌باره‌ی‌ زیاده‌كردنی‌ هه‌نارده‌ی‌ نه‌وته‌وه‌ بكه‌ن و چاوه‌ڕێی ئه‌وه‌ش ده‌كرێت كۆتایی ئه‌مساڵ جارێكی‌ دیكه‌ له‌سه‌ر ئه‌و پرسه‌ كۆببنه‌وه‌.
 
كاوه‌ محه‌مه‌د، ئه‌ندامی‌ لیژنه‌ی‌ نه‌وت و وزه‌ له‌ ئه‌نجومه‌نی‌ نوێنه‌رانی‌‌ عیراق رایده‌گه‌یه‌نێت كه‌ كاره‌كانی‌ كۆنگره‌ی‌ ئۆپیك به‌بێ ئه‌نجام كۆتاییهات.

ئه‌و په‌رله‌مانتاره‌، له‌ په‌یجی تایبه‌تی‌ خۆی‌ له‌ تۆڕی‌ كۆمه‌ڵایه‌تی فه‌یسبووك له‌باره‌ی‌ كۆنگره‌كه‌وه‌ ده‌نووسێت: "رۆژانی 3 و 4ی‌ حوزه‌یرانی‌ 2015 كۆنگرەی رێكخراوی ئۆپێك لە شاری ڤیەننای پایتەختی نەمسا بەڕێوەچوو".

ئاماژه‌ به‌وه‌ ده‌دات، كه‌ وەفدی عیراق بە سەرۆكایەتی عادل عه‌بدولمه‌هدی وەزیری نەوت و ئه‌ندامێتی‌ خۆی‌ وەك ئەندامی لیژنەی نەوت و وزەی پەرلەمانی عیراق و په‌رله‌مانتار ئارێز عه‌بدوڵڵا، سه‌رۆكی‌ لیژنه‌كه‌ لە كۆنگرەكەدا بەشداربوون.

ئه‌وه‌ش ده‌خاته‌ڕوو لەهەردوو رۆژەكەدا چەند پانێلێك بەڕێوەچوون كە سكرتێری گشتی ئۆپێك و وەزیرانی نەوتی (عیراق، ئێران، سعودیە، فەنزویلا، ئەنگۆلا، روسیا، هیندستان، ئیمارات، ئیكوادۆر، كوێت و قەتەر)، هەروەها سەرۆك و بەڕێوەبەرانی كۆمپانیا گەورەكانی وەك (ێیكسۆن مۆبیل، شیڤرۆن، BP و شێڵ) باسیان پێشكەشكرد و قسەیان لەبارەی سەقامگیریی بازاڕی جیهانیی نەوت، پەیوەندیی تەكنۆلۆژیا و پیشەسازیی نەوت، كاریگەریی پیشەسازیی نەوت و وزە بۆ سەر ژینگە و چەند پرسێكی دیكەی پەیوەندار كرد.

ئه‌و په‌رله‌مانتاره‌ ده‌نووسێت: "لەبارەی نرخی نەوت و ئاستی هەناردەكردنی كە كێشەی هەرە سەرەكی ئێستای بازاڕی نەوت و وڵاتانی ئۆپێكە، سعودیە و دەوڵەتانی دیكەی كەنداو لە هەوڵی ئەوەدابوون كە بەشی سەرەكیان لەهەر زیادەیەك بەربكەوێت كە لەسەرووی (٣٠) ملیۆن بەرمیلی رۆژانە بڕیاری لێ بدرێت. لەبەرانبەردا عیراق و ئێرانیش لەكەڵ ئەوەبوون كە مافی پێشینە بۆ ئەوانە بەشی شێریان لە زیادەی نەوت بەربكەوێت، ئێران كە بەرەو ئەوە دەچێت ئابڵووقەی لەسەر هەڵبگیرێت، عیراقیش داوای دەكرد كە دەیەوێت ئاستی هەناردەكردنی خۆی بۆ پێش جەنگەكانی كەنداو بگەڕێنێتەوە، فەنزویلاش دژی هەموو جۆرە زیادكردنێك بوو بۆئەوەی نرخ زیاتر دانەبەزێت. "

ئاشكراشیكرد كه‌ سەرەنجام لە رۆژی (5 و 6ی‌ حوزه‌یران)دا كە وەزیرانی نەوتی ئۆپێك كۆبوونەوە، بڕیاردرا كە درێژە بە جێبەجێكردنی بڕیارەكەی پێشوویان بدەن و هیچ بڕێك بۆ (٣٠)ملیۆن بەرمیلەكە زیاد نەكەن تا لە رۆژی (١٢/٤)ی ئەمساڵدا جارێكی دیكە كۆدەبنەوە و لەبەر رۆشنایی گۆڕانكارییەكانی ئەوسای بازاڕدا لەسەر بڕیارێك رێكدەكەون.

خ.غ


ئه‌م بابه‌ته 1418 جار خوێنراوه‌ته‌وه‌‌

نیشانە کردن

‌‌‌

Copyright © 2015 Xendan.org all rights reserved
Design by AVESTA GROUP , programming and database by KURDSKY.COM