زۆرترین خوێنراو
 
Loading
زانیاری نوێ لەبارەی رووداوی كوشتنی مامۆستا ئەمریكییەكە لەسلێمانی
PM:02:15:01/03/2012
خەندان، توانا عەلی ـ

سەرلەبەیانی ئەمڕۆ قوتابیەكی قوتابخانەی میدیای نمونەیی – ئەمریكی، بەدەمانچەی جۆری كڵۆك لەناو پۆلدا مامۆستایەكی ئەمریكی كوشت‌و دواتریش گولـلەیەكیشی بەسەری خۆیەوەناو به‌هۆی سه‌ختی برینه‌كه‌یه‌وه‌، گیانی له‌ده‌ستدا.

بەپێی ئەو زانیارییانەی لەشوێنی رووداوەكەو لەچەند سەرچاوەیەكی جیاوازەوە دەست "خەندان" كەوتون، لەكاتی وانە وتنەوەدا و قوتابییەكە كە ناوی (ب.س.ر) و تەمەنی 18 ساڵە و دەمانچەیەكی جۆری كڵۆكی – ئەمریكی، دەرهێناوە و تەقەی لەمامۆستاكەی كردووە و چوار گولـلەی پێوەناوە كە سێ گولـلەیان بەر مل‌و گەردنی كەوتوون‌و چوارەمیان داوێتی لە دەموچاوی، بەوهۆیەشەوە دەستبەجێ لەشێونی رووداوەكەدا گیانی لەدەستداوە.

بەپێی زانیارییەكانیش پێشتر مامۆستاكە و خوێندكارەكە كێشەیان هەبووە، بەڵام تائێستا سروشتی كێشەكە روون نەبووەتەوە.
هەر لەوێشدا (ب) كە قوتابی پۆلی یانزە بووە، گولـلەیەک دەنێت بەسەری خۆشیەوە.

دوابەدوای رووداوەكە هێزەكانی پۆلیسی سلێمانی و ئەمبوڵانسی فریاكەوتن و تیمی بەڵگەی تاوان چونەتە شوێنی رووداوەكە، لێكۆڵینەوەیان دەستپێكردووە و وتەی خوێندكارانی پۆلەكە و مامۆستا و بەڕێوەبەری قوتابخانەكە وەرگیراون و لێكۆڵینەوەكانیش بەردەوامن.

سەرچاوەیەكی باڵای پۆلیسی سلێمانیش بە"خەندان"ی راگەیاند كە كونسوڵخانەی ئەمریكا لەهەرێمی كوردستان پەیوەندیان پێوەكردوون و زانیاریان لەبارەی تاوانەكەوە پێدراوە.

بەپێی زانیارییەكانی خەندان مامۆستاكە كە ئاینی كریستیان بووە و بەردەوام لەدەستپێكی وانە وتنەوەدا نوێژی خوێندووە و ئەمڕۆش لەكاتی نوێژ خوێندنەكەدا قوتابییەكە تەقەی لێكردووە.

یەكێك لە مامۆستاكانی قوتابخانەی میدیای نمونەیی كە نەیویست ناوی بڵاوبكرێتەوە بە سایتی "خەندان"ی راگەیاند: مامۆستا ئەمریكییەكە ناوی جێرما سمۆڵ-ەو، لەدایكبووی 1978ەو خەڵكی واشنتۆنە.

وتیشی: مامۆستاكە ماوەی 5 ساڵە لە هەرێمی كوردستان وانە دەڵێتەوە.

ئەوەشی خستەڕوو پێشتر كێشەیەك لەنێوان مامۆستاكەو قوتابییەكەدا روویداوە، بەڵام چاوەڕوان نەكراوە دەرئەنجامی ئەو كێشەیە بگاتە كوشتنی مامۆستاكە.

سەرچاوەیەك لە نەخۆشخانەی فریاكەوتنی سلێمانی بە "خەندان"ی راگەیاند، پاش رووداوه‌كه‌ خوێندكاره‌كه‌ به‌برینداریی ماوه‌ته‌وه‌، به‌ڵام به‌هۆی سه‌ختی برینه‌كه‌یه‌وه‌ دواتر گیانی له‌ده‌ستداوه‌.











ئه‌م بابه‌ته 38902 جار خوێنراوه‌ته‌وه‌‌

هەواڵ

وەرزش

رادیۆ

خزمەتگوزاری

سەبارەت

رێکلام

Copyright 2014. Xendan for Publishing and Broadcasting. All Rights Reserved.