له‌ كه‌ركوك چوار بۆمبی چێنراو پوچه‌ڵكرانه‌وه‌

خه‌ندان - محه‌مه‌د كه‌ركوكی

له‌ گه‌ڕه‌كێكی شاری كه‌ركوك هێزه‌كانی پۆلیس چوار بۆمبی چێنراویان دۆزییه‌وه‌ دواتر له‌ لایه‌ن تیمی پوچه‌ڵكردنه‌وه‌وه‌ توانرا بۆمبه‌كان بته‌قێنرێنه‌وه‌ بێئه‌وه‌ی زیانی لێ بكه‌وێته‌وه‌، له‌ ناحییه‌ی‌ له‌یلانیش هێزه‌كانی پۆلیس ته‌رمێكی نه‌ناسراویان به‌ كوژراوی دۆزییه‌وه‌.

 سه‌رچاوه‌یه‌ك له‌ پۆلیسی كه‌ركوك به‌ خه‌ندانی راگه‌یاند: ئه‌مشه‌و هێزه‌كانی پۆلیس له‌ گه‌ڕه‌كی یه‌كی حوزه‌یرانی شاری كه‌ركوك چوار بۆمبی چێنراویان دۆزییه‌وه‌.

سه‌رچاوه‌كه‌ وتیشی: "دواتر تیمه‌كانی تایبه‌ت به‌ پوچه‌ڵكردنه‌وه‌ی بۆمب ئاگاداركرایه‌وه‌ و توانرا بۆمبه‌كان بته‌قێنرێنه‌وه‌ بێ ئه‌وه‌ی زیانی لێبكه‌وێته‌وه‌".

سه‌رچاوه‌یه‌كیش له‌ بنكه‌ی پۆلیسی ناحییه‌ی‌ له‌یلانی سه‌ر به‌ پارێزگای كه‌ركوك به‌ خه‌ندانی راگه‌یاند: ئێواره‌ی ئه‌مڕۆ هه‌ینی هێزه‌كانی پۆلیس له‌ ناو ناحیه‌ی‌ له‌یلان ته‌رمێكی نه‌ناسراویان به‌ كوژراوی دۆزییه‌وه‌" .

سه‌رچاوه‌كه‌ وتی: " ته‌رمی كه‌سێك بووه‌ كه‌ ته‌مه‌نی له‌ نێوان (35 بۆ40) ساڵدایه‌ و ئاسه‌واری گولـلــه‌ به‌ جه‌سته‌یه‌وه‌یه‌".

سه‌رچاوه‌كه‌ ئاماژه‌ی بۆ ئه‌وه‌شكرد كه‌ له‌ نزیكی ته‌رمه‌كه‌ قه‌وانی فیشه‌كی ده‌مانچه‌ دۆزراوه‌ته‌وه‌ بۆیه‌  پێده‌چێت به‌ ده‌مانچه‌ كوژرابێت.
وتیشی: "له‌ ئێستادا ته‌رمه‌كه‌ ره‌وانه‌ی پزیشكی دادی كه‌ركوك كراوه‌ به‌ مه‌به‌ستی پشكنین و ناسینه‌وه‌ی‌".


ئه‌م بابه‌ته 1530 جار خوێنراوه‌ته‌وه‌‌

نیشانە کردن

‌‌‌

Copyright © 2015 Xendan.org all rights reserved
Design by AVESTA GROUP , programming and database by KURDSKY.COM