خه‌ندان –
ئه‌مڕۆش بارانبارین له‌ ناوچه‌كانی‌ هه‌رێمی‌ كوردستان به‌رده‌وام بوو، شاری‌ سلێمانیش له‌ كه‌شێكی‌ باراناوی‌ و ته‌مومژاویدا رۆژی‌ به‌ڕێكرد.

نه‌قیب خه‌ڵوه‌ت ئه‌حمه‌د به‌ڕێوه‌به‌ری‌ راگه‌یاندنی‌ به‌رگری‌ شارستانی‌ سلێمانی‌ له‌ لێدوانێكیدا بۆ خه‌ندان رایگه‌یاند: خۆشبه‌ختانه‌ تائێستا هیچ حاڵه‌تێكی‌ نه‌خوازراو له‌ سنووری‌ شاری‌ سلێمانی‌ به‌هۆی‌ بارانه‌وه‌ تۆمار نه‌كراوه‌.

ئه‌گه‌رچی‌ ناوبراو رایگه‌یاند كه‌ تیمه‌ گه‌ڕۆكه‌كانیان به‌به‌رده‌وامی‌ چاودێری‌ ئه‌و گه‌ڕه‌كانه‌ ده‌كه‌ن كه‌ ئه‌گه‌ری‌ دروستبوونی‌ لافاویان تێدایه‌.

له‌ماوه‌ی 24 سه‌عاتی رابردوودشدا له‌ سه‌رجه‌م ناوچه‌كانی هه‌رێمی كوردستان باران به‌ بڕی جیاواز باریوه ‌و پێشبینی ده‌كرێت تا سبه‌ینێ دوانیوه‌ڕۆ به‌رده‌وام بێت.

فازڵ ئیبراهیم، به‌ڕێوه‌به‌ری فه‌رمانگه‌ی كه‌شناسی و بوومه‌له‌رزه‌ی هه‌رێمی كوردستان به‌ (خه‌ندان) ی راگه‌یاند: له‌ درێژه‌ی ئه‌و شه‌پۆلی بارانبارینه‌ی هه‌رێمی كوردستانی گرتووه‌ته‌وه‌، به‌بڕی جیاواز له‌ سه‌رجه‌م ناوچه‌كانی هه‌رێم باران باریوه‌.

له‌ باره‌ی رێژه‌ی بارانبارین له‌ ناوچه‌كانی هه‌رێم، فازڵ ئیبراهیم وتی: "له‌ماوه‌ی 24 سه‌عاتی رابردودا رێژه‌ی بارانبارین له‌ ناوچه‌كانی هه‌رێم به‌و جۆره‌ تۆماركراوه‌، هه‌ولێر 29 ملم و كۆی گشتی 243، دهۆك 28 ملم و كۆی گشتی 442، سلێمانی 7 ملم و كۆی گشتی 379، پیرمام 48 ملم، ره‌واندز 41، شێروان مه‌زن 139، خه‌بات 32، مه‌خمور 14، چه‌مچه‌ماڵ 7، پێنجوێن 36، قه‌ڵادزێ 61، كه‌لار 5، زاخۆ 56، ئامێدی 55، ئاكرێ 74، دینارته‌ 89، كه‌ركوك 5، خانه‌پین 2، خورماتوو 4 ملم باران باریوه‌.

راشیگه‌یاند: بارانبارین له‌ هه‌رێمی كوردستان تا دوانیوه‌ڕۆی رۆژی سێشه‌ممه‌ به‌رده‌وام ده‌بێت و دواتر كاریگه‌رییه‌كانی كه‌م ده‌بێته‌وه‌.