پێشمه‌رگه‌ له‌ كه‌سكین كشایه‌وه‌ (نوێکراوەتەوە)

خه‌ندان ـ ره‌ڤه‌ند گوهه‌رزی، سەعید محەمەد
هێزی پێشمه‌رگه‌ی كوردستان له‌ناوچه‌ی كه‌سكینی سه‌ر به‌ بازگه‌ی ره‌بیعه‌ كشانه‌وه‌ به‌ره‌و زوومار و شه‌هیدێك و شه‌ش برینداریشیان هه‌یه‌.

یه‌كێك له‌ پێشمه‌رگه‌كان له‌و سنووره‌ به‌ خه‌ندانی راگه‌یاند: دوای شه‌ڕێكی قورس و به‌رگریه‌كی سه‌ختی هێزه‌كانی پێشمه‌رگه‌ له‌ ناوچه‌ی كه‌سكین له‌ سنووری بازگه‌ی ره‌بیعه‌، كه‌مێك پێش ئێستا هێزه‌كانی پێشمه‌رگه‌ له‌و ناوچه‌یه‌ پاشه‌كشه‌یان كرد.

وتیشی: "كشانه‌وه‌ی پێشمه‌رگه‌ بەهۆی بۆردومانی فڕۆکە جەنگیەکانی سوپای عیراقەوەیە، بۆ ئەوەی زیانیان بەرنەکەوێت".

هه‌روه‌ك ئه‌وه‌شی نه‌شارده‌وه‌، كه‌ داعش به‌ هێزێكی زۆره‌وه‌ هێرشی ده‌ستپێكردوه‌، به‌ڵام وره‌ی پێشمه‌رگه‌ زۆر به‌رزه‌.
 
هاوكات سه‌رچاوه‌یه‌كی ئاگادار له‌ ناوچه‌كه‌ به‌ خه‌ندانی راگه‌یاند: برینداره‌كانی پێشمه‌رگه‌ به‌ره‌و نه‌خۆشخانه‌ زاخۆ و دهۆك گوازراونه‌ته‌وه‌.

لای خۆیه‌وه‌ سه‌رچاوه‌یه‌كی ئه‌منی به‌ خه‌ندانی راگه‌یاند: له‌و ناوچه‌یه‌ی شه‌ڕی تێدایه‌ زیاتر له‌ 10 گوندی عه‌شیره‌تی گه‌رگه‌ری كه‌ هه‌موویان كوردن كه‌وتنه‌ ده‌ستی داعش و پێشمه‌رگه‌ له‌ چه‌ند ناوچه‌یه‌كه‌وه‌ پاشه‌كشه‌ی كردوه‌.

ئه‌م بابه‌ته 21189 جار خوێنراوه‌ته‌وه‌‌

نیشانە کردن

‌‌‌

Copyright © 2015 Xendan.org all rights reserved
Design by AVESTA GROUP , programming and database by KURDSKY.COM