فه‌تلاوی‌: بێزار بووین له‌ گێچه‌ڵه‌كانی‌ بارزانی‌

خه‌ندان-

سه‌رۆكی‌ فراكسیۆنی‌ ئیراده‌ له‌ ئه‌نجومه‌نی‌ نوێنه‌رانی‌ عیراق رایگه‌یاند، لێدوانه‌كانی‌ پارتی‌ دیموكراتی‌ كوردستان سه‌باره‌ت به‌ جیابوونه‌وه‌ له‌ به‌غدا، درۆن و دوورن له‌ڕاستییه‌وه‌، ئاماژه‌ی‌ به‌وه‌شكرد گه‌ر هه‌رێمی‌ كوردستان هه‌نگاوێكی‌ له‌و جۆره‌ هه‌ڵبنێت، له‌پێش هه‌موانه‌وه‌ پیرۆزبایی‌ لێده‌كات، ئه‌وه‌شی‌ ره‌تكرده‌وه‌ شاری‌ كه‌ركوك به‌شێك بێت له‌ كوردستان.

فه‌تلاوی‌ له‌ لێدوانێكیدا بۆ ماڵپه‌ڕی‌ (سۆمه‌ریه‌ نیوز) وتی‌: "داوای‌ حزبه‌كه‌ی‌ مه‌سعود بارزانی‌ سه‌رۆكی‌ هه‌رێمی‌ كوردستان بۆ جیابوونه‌وه‌ له‌ به‌غدا، درۆیه‌ و دووره‌ له‌ڕاستییه‌وه‌، ئه‌گه‌ر ئه‌و بڕیاره‌ی‌ به‌ راسته‌، یه‌كه‌م كه‌س ده‌بم پیرۆزبایی‌ له‌و جیابوونه‌وه‌یه‌ ده‌كه‌م، چونكه‌ ئێمه‌ بێزاربووین له‌ كێشه‌ و گێچه‌ڵه‌ یه‌ك له‌دوا یه‌كه‌كانی‌ بارزانی".

فه‌تلاوی‌ سه‌رسوڕمانی‌ خۆی‌ به‌رانبه‌ر به‌ بێده‌نگبوونی‌ حكومه‌تی‌ فیدراڵ له‌ ئاست ئه‌و لێدوانانه‌دا ده‌ربڕی‌ و وتی‌: "ده‌بێت بارزانی‌ بزانێت كه‌ جیابوونه‌وه‌ی‌ له‌چوارچێوه‌ی‌ سنوره‌كانی‌ هه‌رێمدا ده‌بێت پێش روخانی‌ رژێمی‌ پێشوو له‌ نیسانی‌ 2003 و به‌هیچ شێوه‌یه‌ك كه‌ركوك نابێته‌ به‌شێك له‌ هه‌رێمی‌ كوردستان".

حه‌نان فه‌تلاوی‌ له‌ درێژه‌ی‌ قسه‌كانیدا وتیشی‌:"بارزانی‌ ده‌یه‌وێت دوو ساڵی‌ تری‌ سه‌رۆكایه‌تی‌ بۆ درێژبكرێته‌وه‌، بۆیه‌ هه‌وڵده‌دات فێڵ له‌ كورد بكات و بڵێت له‌ ماوه‌ی‌ دوو ساڵدا راپرسی‌ ده‌كرێت"، به‌پێویستیشی‌ زانی‌ رێگه‌ له‌و هه‌وڵانه‌ بگرێت كه‌ گه‌لی‌ كورد به‌ره‌و هه‌ڵدێر ده‌به‌ن.

هێمن هه‌ورامی‌ سه‌رۆكی‌ لیژنه‌ی‌ په‌یوه‌ندییه‌كانی‌ ده‌ره‌وه‌ له‌ پارتی‌ دیموكراتی‌ كوردستان، له‌ میانی‌ كۆڕێكدا له‌ په‌یانگای‌ رۆژهه‌ڵاتی ناوه‌ڕاست له‌ واشنتۆن، ئاماژه‌ی‌ به‌و هه‌وڵانه‌ كرد كه‌ هه‌رێم بۆ جیابوونه‌وه‌یه‌كی‌ خوازراو له‌ به‌غدا خستویه‌تیه‌گه‌ڕ و روونیشكرده‌وه‌ كه‌ له‌ ماوه‌ی‌ كه‌متر له‌ ساڵێكدا  راپرسییه‌ك بۆ ئه‌و مه‌به‌سته‌ رێكده‌خرێت.     

خ.غ     

    


ئه‌م بابه‌ته 15193 جار خوێنراوه‌ته‌وه‌‌


Copyright © 2015 Xendan.org all rights reserved
Design by AVESTA GROUP , programming and database by KURDSKY.COM