به‌وێنه‌ و زانیاری.. نه‌هامه‌تیی ئێزدییه‌كان له‌ توركیا

خه‌ندان ـ

ئێزیدی، ئاینیێكی كۆنی كۆمه‌ڵگه‌ی كورده‌وارییه‌ كه‌ به‌ستراوه‌ به‌ ئایینه‌كانی زه‌رده‌شتی و وڵاتی نێوان دوو رووبار، ئێزدییه‌كان به‌ شێوه‌یه‌كی سه‌ره‌كی له‌ سنووری پارێزگای نه‌ینه‌وا ده‌ژین و دوای داگیركردنی ئه‌و شاره‌ له‌لایه‌ن رێكخراوی تیرۆرستیی داعشه‌وه‌، ژماره‌یه‌كی زۆریان لێ كوژرا.

ئیڤان حه‌سه‌ن موراد، شاره‌زای كاروبای ئێزدییه‌كان و مامۆستا له‌ زانكۆی زاخۆ، تایبه‌ت به‌ خه‌ندانی راگه‌یاند: له‌ 3ی ئابی 2014، رێكخراوی تیرۆرستیی داعش هێرشی كرده‌سه‌ر قه‌زای شنگال و ئه‌وه‌ش وایكرد زۆربه‌ی ئێزدییه‌كان كۆچ به‌ره‌و هه‌رێمی كوردستان و سوریا و توركیا بكه‌ن.

ئه‌و ئێزدییانه‌ی په‌نایان بۆ توركیا برد و ئاواره‌ی ئه‌و وڵاته‌ بوون، له‌ كامپه‌كانی دیاربه‌كر و باتمان و نێسبین و چه‌ند ناوچه‌یه‌كی دیكه‌ نیشته‌جێ كران، له‌ توركیا ئێزدییه‌كان به‌شێوه‌یه‌كی كاتی له‌ كامپ و گونده‌كانی نیشته‌جێكران، به‌تایبه‌ت گوندی باچینی كه‌ له‌ بنه‌چه‌دا ئه‌و گونده‌، گوندێكی ئێزیدییه‌ و ساڵانی 1990 به‌هۆی شه‌ڕی په‌كه‌كه‌وه‌ له‌لایه‌ن سوپای توركیاوه‌ خاپوور كرا.

هاوكات به‌هۆی مامه‌ڵه‌ی خراپ و هه‌ڕه‌شه‌ی هه‌ندێك توندڕه‌وی چه‌ندین ناوچه‌ی توركیا به‌تایبه‌ت له‌ شاری دیاربه‌كر، هه‌زاران ئێزدیی ئاواره‌ی ئه‌و وڵاته‌ كامپه‌كانیان جێده‌هێڵن و به‌ره‌و ئه‌وروپا مل ده‌نێن، رۆژنامه‌نووسێكی ئێزدی به‌ناوی حه‌سه‌ن قه‌واڵ ره‌شید، ئاشكرایكرد كه‌ هۆكاری ئه‌وه‌ی كه‌ هه‌زاران ئێزدی بڕیاریانداوه‌ كۆچی زیاتر بكه‌ن، مامه‌ڵه‌ی خراپی حكومه‌ت و هێزه‌كانی توركیایه‌ له‌گه‌ڵیان.

شایه‌تحاڵێك له‌ شاری دیاربه‌كر كه‌ نه‌یویست ناوی ئاشكرا بكرێت به‌ خه‌ندانی راگه‌یاند: ئێزدییه‌كان خۆیان پاسه‌وانی و پارێزگاری له‌ كامپه‌كه‌یان ده‌كه‌ن، كه‌ پرسیاری له‌ یه‌كێكیشیان كردووه‌ بۆ ئه‌و كاره‌ ده‌كه‌ن، ئه‌و ئێزدییانه‌ وتویانه‌"خه‌ڵكانێكی نه‌ناسراو هه‌ڕه‌شه‌ی كوشتنمان لێده‌كه‌ن، هه‌ربۆیه‌ خۆمان پارێزگاری له‌ سه‌روماڵی خۆمان ده‌كه‌ین."

ئێزدییه‌كی دیكه‌ی كامپه‌كانی توركیا رایگه‌یاندووه‌ كه‌ چیتر ئێزدییه‌كان ناتوانن به‌رگه‌ی ژیانی تاڵی ناو توركیا بگرن، بۆیه‌ بڕیاریان داوه‌ كامپه‌كه‌ جێبهێڵن و به‌ره‌و سنووره‌كانی بولگاریا بڕۆن، زۆرێكی دیكه‌ش ئاماژه‌یان به‌وه‌داوه‌ كه‌ چه‌ندین پیاوی پیر و منداڵ كه‌ ویستوییانه‌ له‌ كامپه‌كه‌ هه‌ڵبێن، له‌لایه‌ن جه‌ندرمه‌ی توركیاوه‌ به‌توندی ئازار دراون و به‌زۆر گه‌ڕێنراونه‌ته‌وه‌ كامپه‌كه‌.

له‌گه‌ڵ ئه‌وه‌شدا زۆرێكی دیكه‌ی ئه‌و ئاواره‌ ئێزیدییانه‌ توانیویانه‌ بگه‌نه‌ سنووره‌كانی بولگاریا و ئێستا چاوه‌ڕوانی چاره‌نووسی خۆیانن و نازانن چیان به‌سه‌ردێت.























ئه‌م بابه‌ته 1814 جار خوێنراوه‌ته‌وه‌‌


Copyright © 2015 Xendan.org all rights reserved
Design by AVESTA GROUP , programming and database by KURDSKY.COM