ئه‌گه‌ر قه‌یرانی‌ به‌نزین چاره‌سه‌ر نه‌كرا پارێزگار ‌و جێگره‌كه‌ی‌ ده‌ستله‌كارده‌كێشنه‌وه‌

خه‌ندان - هۆگر كه‌مال


كه‌مێك له‌مه‌وبه‌ر، له‌ دیوانی پارێزگای سلێمانی د. ئاسۆ فه‌ره‌یدون پارێزگاری‌ سلێمانی‌، له‌ كۆنگره‌یه‌كی رۆژنامه‌وانیدا مژده‌ی‌ ئه‌وه‌ی‌ دایه‌ هاوڵاتیان كه‌ له‌ هه‌وڵدان قه‌یرانی‌ به‌نزین له‌ شاری‌ سلێمانی‌ چاره‌سه‌ر بكه‌ن ‌و تا هه‌فته‌ی‌ داهاتووش قه‌یرانه‌كه‌ چاره‌سه‌ر ده‌كه‌ن، جێگری‌ پارێزگاری‌ سلێمانیش به‌ناوی‌ خۆیی‌ ‌و پارێزگاره‌وه‌ ده‌ڵێت: "ئه‌گه‌ر نه‌مانتوانی‌ قه‌یرانه‌كه‌ چاره‌سه‌ر بكه‌ین ده‌ستله‌كارده‌كێشینه‌وه‌".

له‌ كۆنگره‌ رۆژنامه‌وانیه‌كه‌دا، د. ئاسۆ فه‌ره‌یدون، پارێزگاری‌ سلێمانی‌، وتی‌: "كوردستان له‌ حاڵه‌تی جه‌نگدایه‌ و ده‌بێت ئارامی سیاسی و ئابوری و ئه‌منی بپارێزین".

ته‌ئكیدیشی‌ كرده‌وه‌: "شۆفێران و هاوڵاتیان دڵنیاده‌كه‌ینه‌وه‌ كه‌ تاوه‌كو رۆژی سێشه‌ممه‌ 23-6-2015، كێشه‌ی به‌نزین چاره‌سه‌رده‌كرێت".

پارێزگاری‌ سلێمانی‌، وتیشی‌: "بارودۆخه‌كه‌ ناسكه‌ و به‌ هیچ شێوه‌یه‌ك رێگه‌ ناده‌ین ململانێی سیاسی و قه‌یرانی سیاسی بهێندرێته‌ سلێمانی و ئه‌منیه‌ت ‌و ئاسایشی شاره‌كه‌ هێڵی سوره‌".

له‌ كۆنگره‌ رۆژنامه‌وانیه‌كه‌دا سه‌ردار قادر جێگری پارێزگاری سلێمانی رایگه‌یاند: "سلێمانی رۆژانه‌ پێویستی به‌ دوو ملیۆن و 500 هه‌زار لیتر به‌نزین هه‌یه‌، له‌ ئێستاشدا وه‌زاره‌تی سامانه‌ سروشتیه‌كان ته‌نها یه‌ك ملیۆن لیتر به‌نزینمان بۆ ده‌نێرێت".

وتیشی‌: "له‌مه‌ودوا له‌ رێگه‌ی ژماره‌یه‌ك بازرگانه‌وه‌ به‌نزین بۆ سلێمانی هاورده‌ ده‌كرێت".
ئاماژه‌ی‌ به‌وه‌شدا: "ئێمه‌ چاودێری وردی كوالێتی به‌نزینی هاورده‌كراو ده‌كه‌ین، نرخه‌كه‌شی هه‌رچه‌ند ناتوانین دیاری بكه‌ین، به‌ڵام زۆر گران نابێت ‌و گونجاو ده‌بێت".

جێگری‌ پارێزگاری‌ سلێمانی‌، ئه‌وه‌شی‌ خسته‌ڕو، كه‌ "له‌ڕێگه‌ی كێبڕكێی شه‌ریفانه‌ی بازرگانه‌كانه‌وه‌ نرخی سوته‌مه‌نی هه‌رزان ده‌بێت و گران نابێت".

ئاشكراشیكرد، كه‌ له‌ سبه‌ینێوه‌ 12 به‌نزیخانه‌ به‌نزین به‌ نرخی‌ بازرگانی‌ ده‌فرۆشن بۆ چاره‌سه‌ری‌ قه‌یرانه‌كه‌ ‌و به‌نزینخانه‌ حكومیه‌كانیش ده‌مێنێت"

سه‌ردار قادر، باسی‌ له‌وه‌شكرد: "گازی پێویست بۆ مۆلیده‌ ئه‌هلیه‌كان دابین ده‌كه‌ین، جگه‌ له‌وه‌ش به‌نزین و گازوایل بۆ ئۆتۆمبێلی فه‌رمانگه‌كانی حكومه‌ت دابین ده‌كه‌ین".

له‌ وه‌ڵامی پرسیارێكی په‌یامنێراندا، جێگری‌ پارێزگاری‌ سلێمانی‌ ئاماژه‌ی‌ به‌وه‌دا: "به‌ناوی‌ خۆم ‌و پارێزگاری‌ سلێمانییه‌وه‌ ده‌ڵێم، ئه‌گه‌ر نه‌مانتوانی‌ قه‌یرانی‌ به‌نزین چاره‌سه‌ر بكه‌ین ده‌ستله‌كار ده‌كێشینه‌وه‌".


ئه‌م بابه‌ته 6448 جار خوێنراوه‌ته‌وه‌‌


Copyright © 2015 Xendan.org all rights reserved
Design by AVESTA GROUP , programming and database by KURDSKY.COM