یاسین حه‌سه‌ن: نه‌بوونی سوته‌مه‌نی قه‌یرانی كاره‌با زیاتر ده‌كات

خه‌ندان ـ ده‌روون ره‌شید
وته‌بێژی وه‌زاره‌تی كاره‌بای حكومه‌تی هه‌رێمی كوردستان رایده‌گه‌یه‌نێت، له‌گه‌ڵ هاتنی مانگی پیرۆزی ره‌مه‌زان خواستی هاوڵاتیان بۆ به‌كارهێنانی كاره‌با زیادیكردووه‌ كه‌ ئه‌مه‌ش بوه‌ته‌ هۆی كه‌مبوونه‌وه‌ی پێدانی كاتژمێره‌كانی كاره‌با له‌لایه‌ن وه‌زاره‌تی كاره‌باوه‌، ده‌شڵێت: "ئه‌گه‌ر به‌زووتریت كات بڕی پێویستی سووته‌مه‌نی  بۆ یه‌كه‌كانی به‌رهه‌مهێنانی كاره‌با دابین نه‌كرێت، ئه‌وا كێشه‌ی نه‌بوونی كاره‌با گه‌وره‌تر ده‌بێت".

ئه‌ندازیار یاسین حه‌سه‌ن، وته‌بێژی وه‌زاره‌تی كاره‌بای حكومه‌تی هه‌رێمی كوردستان به‌ خه‌ندانی راگه‌یاند: "ماوه‌ی چه‌ند رۆژێكه‌ له‌ هه‌رێمی كوردستان كاتژمێره‌كانی پێدانی كاره‌با كه‌میكردووه‌، كه‌ ئه‌مه‌ش بۆ به‌رزبوونه‌وه‌ی خواستی هاوڵاتیان له‌به‌كارهێنانی كاره‌باوه‌ ده‌گه‌رێته‌وه‌، به‌ تایبه‌ت له‌گه‌ڵ ده‌ستپێكردنی مانگی پیرۆزی ره‌مه‌زاندا له‌ دوای 12 ی  شه‌وه‌وه‌ كاره‌با له‌لایه‌ن هاوڵاتیانه‌وه‌ زیاتر به‌كاردێت".

وتیشی: "هۆكارێكی دیكه‌ی كه‌مبوونه‌وه‌ی پێدانی كاتژمێره‌كانی كاره‌با ده‌گه‌ڕێته‌وه‌ بۆ كه‌می سووته‌مه‌نی كه‌ له‌ رۆژی هه‌ینییه‌وه‌ كێشه‌ی ستووته‌مه‌نیمان هه‌یه‌ بۆ چه‌ند یه‌كه‌یه‌كی به‌رهه‌مهێنان".

سه‌باره‌ت به‌ هۆكاری پچڕاندنی كاره‌با له‌ چه‌ند گه‌ڕه‌كێكی ناوشاری سلێمانی بۆ چه‌ند خوله‌كێك به‌ده‌ر له‌ به‌رنامه‌ی كاره‌با، یاسین  حه‌سه‌ن وتی: "ئه‌و كێشه‌یه‌ ته‌نها له‌ سلێمانی نییه‌، به‌ڵكو له‌ هه‌موو پارێزگاكان هه‌یه‌، كه‌ ئه‌وه‌ش سیستمێكه‌ پێی ده‌وترێت under frequency protection، بۆ پاراستنی هه‌موو سیستمی كاره‌بایه‌ كه‌ چه‌ند فیده‌رێكمان تیاداناوه‌ بۆنمونه‌ له‌ جیاتی ئه‌وه‌ی هه‌مو سیستمی كاره‌با بكوژێته‌وه‌ له‌ حاڵه‌تی له‌ كاركه‌وتنی یه‌كه‌یه‌كی به‌رهه‌مهێناندا یان كه‌وتنی لایه‌نێكی كاره‌با  وا ده‌كات له‌ ده‌ره‌وه‌ی به‌رنامه‌ی كاره‌با ماوه‌ی 5-10 خوله‌ك كاره‌بای ناوچه‌یه‌ك ببڕدرێت".

باسی له‌وه‌شكرد:"له‌ سه‌ره‌تای مانگی حوزه‌یران رامانگه‌یاند، كه‌ ده‌توانین نزیكه‌ی 17 كاتژمێر كاره‌بای نیشتیمانی دابین بكه‌ین، بۆیه‌ له‌ سه‌ره‌تای مانگه‌وه‌ تا 15ی مانگ 20 كاتژمێر كاره‌بای نیشتیمانی دراوه‌ به‌ هاوڵاتیان، به‌ڵام دوای 15 ی مانگ به‌ تایبه‌ت له‌گه‌ڵ ده‌ستپێكردنی مانگی ره‌مه‌زاندا خواستی كاره‌با زیادی كردووه‌ و بڕینی كاره‌باش زیاتر بووه‌ كه‌ ئێستا نزیكه‌ی 16-17 كاتژمێر كاره‌با ده‌درێته‌ هاوڵاتیان".

وته‌بێژی وه‌زاره‌تی كاره‌بای حكومه‌تی هه‌رێمی كوردستان  وتیشی: "ئێمه‌ هیچ یه‌كه‌یه‌كی تری به‌رهه‌مهێنانمان نییه‌ تا بیخه‌ینه‌ كار بۆیه‌ ناتوانرێت هیچ هه‌نگاوێك بنرێت بۆ ئه‌م حاڵه‌ته‌ و چاره‌سه‌ر بكرێت".

راشیگه‌یاند: له‌ ئێستادا چوار وێستگه‌ له‌كار وه‌ستاون به‌هۆی دابین نه‌كردنی سووته‌مه‌نیه‌وه‌، بۆیه‌ ئه‌گه‌ر بێت و به‌زووتریت كات بڕی پێویستی سووته‌مه‌نی  بۆ یه‌كه‌كانی به‌رهه‌مهێنانی  كاره‌با دابین نه‌كرێت، ئه‌وا كێشه‌كه‌ گه‌وره‌تر ده‌بێت".

ئه‌ندازیار یاسین حه‌سه‌ن ئاماژه‌ی به‌وه‌شدا: "ئه‌و موه‌لیدانه‌ی كه‌ سه‌رپێچی له‌  رێنماییه‌كانی وه‌زاره‌تی كاره‌با ده‌كه‌ن و به‌رنامه‌ی خۆیان له‌ كاتی نه‌بوونی كاره‌بای نیشتیمانی جێبه‌جێ ناكه‌ن و كه‌مته‌رخه‌من له‌ كاره‌كانیان له‌ كاتێكدا كێشه‌یه‌كی ته‌كنیكی له‌ موه‌لیده‌كانیاندا نییه‌، له‌لایه‌ن قایمقامیه‌تی  سلێمانی و له‌لایه‌ن یه‌كه‌ ئیداریه‌كانه‌وه‌ پێویسته‌ سزابدرێن".

لای خۆشیه‌وه‌ به‌رزان محه‌مه‌د، به‌ڕێوه‌به‌ری وه‌رشه‌ی ناوه‌ندی كاره‌بای سلێمانی به‌ خه‌ندانی راگه‌یاند: "ئه‌وبه‌رنامه‌ شه‌ش سه‌عاتیه‌ی كه‌ دامانناوه‌ له‌ 12 نیوه‌ڕۆ بۆ 12 شه‌و  كه‌ سلێمانی كراوه‌ به‌ دوو زۆنه‌وه‌  هه‌ر گه‌ڕه‌كێك شه‌ش سه‌عات كاره‌بای موه‌لیده‌ی پێده‌درێت، به‌ڵام له‌گه‌ڵ هاتی ره‌مه‌زاندا شه‌و نا شه‌وێك كاره‌با ده‌بێت و موه‌لیده‌كان كاره‌با ده‌ده‌نه‌ هاوڵاتیان".

وتیشی: "ئێمه‌ هه‌موو موه‌لیده‌كانمان ئاگادار كرووه‌ته‌وه‌ كه‌له‌ پارشێواندا له‌ نه‌بوونی كاره‌بای نیشتیمانی، ده‌بێت موه‌لیده‌كانیان هه‌ڵبكه‌ن و كاره‌بای هاوڵاتیان دابین بكه‌ن، به‌ پێچه‌وانه‌وه‌ ئه‌گه‌ر كاره‌با بۆ هاوڵاتیان دابین نه‌كه‌ن سزای یاسایی خۆیان وه‌رده‌گرن".

هــ. ر


ئه‌م بابه‌ته 1145 جار خوێنراوه‌ته‌وه‌‌


Copyright © 2015 Xendan.org all rights reserved
Design by AVESTA GROUP , programming and database by KURDSKY.COM