زۆرترین خوێنراو
 
Loading
یەكەم كاردانەوەی بزوتنەوەی گۆڕان لەسەر چاوپێكەوتنەكەی مام جەلال
PM:12:38:04/03/2012
خەندان- ئارام غەفور

پاش ئەوەی ئەمڕۆ لەچاوپێكەوتنێكیدا لەگەڵ رۆژنامەی هاوڵاتی مام جەلال رایگەیاند: لەگەڵ ئەوەدایە كە پەیوەندییەكانیان لەگەڵ گۆڕاندا ئاسایی بێت‌و زۆر شتی موشتەرەك هەیە لەنێوانیاندا، بەرپرسێكی باڵای بزوتنەوەی گۆڕان لەیەكەم كاردانەوەیاندا رایگەیاند پێشوازی لەو لێدوانە دەكەنو خاڵە هاوبەشەكانیان لەگەڵ یەكێتی زۆر زیاترە.

سەڵاح رەشید بەرپرسی رێكخستنەكانی بزوتنەوەی گۆڕان بەسایتی خەندان-ی راگەیاند: بەهەموو شێوەیەك پێشوازی لەهەر هەوڵێك دەكەن بۆ ئاسایی بوونەوەی پەیوەندییەكانیان لەگەڵ یەكێتیی نیشتیمانیی كوردستانداو لێدوانەكانی مام جەلال-یشی بە "هەنگاوێكی ئیجابی" بۆ ئاساییكردنەوەی پەیوەندییەكانیان لەگەڵ یەكێتیدا وەسفكرد.

مام جەلال سەرۆك كۆمارو سكرتێری گشتیی یەكێتیی نیشتیمانیی كوردستان لەچاوپێكەوتنێكدا كە ئەمڕۆ لە رۆژنامەی "هاوڵاتی" بڵاوكرایەوە رایگەیاند؛ "خۆم لایەنگری ئەوەم نێوانی یەكێتی‌و گۆڕان ئاسایی ببێتەوە، هاوكاری هەبێت لەنێوانماندا لەجیاتی ناكۆكی، هەڵبدەین بیروڕامان لەسەر زۆر مەسەلە یەكخەین (...) هەروەها هەوڵ بدەین كاری پێكەوەیی بكەین لەپێناوی ئامانجە هاوبەشەكاندا".

بەپێویستیشیزانی لەئێستادا هاوپەیمانی لەنێوانیاندا هەبێت، چونكە یەكێتی‌و گۆڕان لەرووی "مەوزوعییەوە زۆر لێكنزیكن ‌و هیچ ناكۆكییەك نییە لەنێوانماندا، زۆر شتمان موشتەرەكە".

بەرپرسی رێكخستنەكانی بزووتنەوەی گۆڕان ئەوەشیخستەڕوو كە خاڵی هاوبەشی نێوان گۆڕان و یەكێتی، زیاترە لە خاڵە هاوبەشەكانی نێوان گۆڕان و لایەنەكانی دیكە.

بزووتنەوەی گۆڕان كە پێشتر لەناو یەكێتی نیشتمانی كوردستاندا بەباڵی ریفۆرم ناسرابوو، ساڵی (2009) بەسەركردایەتی نەوشیروان مستەفا جێگری پێشووی سكرتێری گشتیی یەكێتیی نیشتمانی لەیەكێتی جیابوونەوە.

دوای ماوەیەكی زۆر گرژی نێوانیان، بەڵام بەمدواییە پەیوەندییەكانی نێوان یەكێتی و گۆڕان بەرەو هێوربوونەوە چوون‌و دووجاریش پەیوەندی تەلەفۆنی لەنێوان مام جەلال‌و نەوشیروان مستەفادا روویداوەو ئەوەش وەك سەرەتایەك بۆ ئاسایی بوونەوەی پەیوەندییەكانی نێوان هەردوو حزب لێكدرایەوە.
ئه‌م بابه‌ته 14966 جار خوێنراوه‌ته‌وه‌‌

هەواڵ

وەرزش

رادیۆ

خزمەتگوزاری

سەبارەت

رێکلام

Copyright 2014. Xendan for Publishing and Broadcasting. All Rights Reserved.